तळेगाव दाभाडे:
उद्यमी होताना महिलांनी दृढनिश्चय, आत्मविश्वास आणि आपल्यातील क्षमतांना पूरेपूर वापर केला पाहिजे. संकटे ही मानसिक आंदोलनांची परीक्षा असल्याने त्याला आश्वासक पणे सामोरे गेलात, तर यश निश्चित आहे, असे प्रेरणादायी प्रतिपादन केंद्रीय मंत्री स्मृती इराणी यांची आई शिबानी बागची यांनी मंगळवारी येथे केले.
आंतरराष्ट्रीय मिलेट्स वर्षानिमित्त रूडसेट संस्थेतर्फे ग्रामीण महिलांसाठी घेण्यात आलेल्या फास्ट फूड स्टॉल उद्यमी मोफत प्रशिक्षण सत्राच्या समारोप समारंभात प्रमुख पाहुण्या म्हणून त्या बोलत होत्या. अध्यक्षस्थानी प्रेस फौंडेशनचे अध्यक्ष अमिन खान होते.
रूडसेटचे संचालक प्रवीण बनकर म्हणाले, की ग्रामीण विकास व स्वयंरोजगार प्रशिक्षण संस्था पुणे (रूडसेट)चे यंदा रौप्यमहोत्सवी वर्ष आहे. आतापर्यंत राज्यातील 12 हजारावर ग्रामीण तरूण व महिलांना रोजगार कौशल्यांच्या अभ्यासक्रमांचे मोफत प्रशिक्षण देण्यात आले. त्यातून 8 हजार 500 जणांनी स्वयंरोजगार उभारलेत.
महिलांमध्ये आव्हाने पेलण्याची निसर्गदत्त शक्ती असल्याने पुरूषांच्या तुलनेत महिला अधिक सक्षम असतात, हे वास्तव समजून घेतल्यास कोणतेही काम त्या सरस करू शकतील. मात्र यश हे केवळ स्वत:पुरते मर्यादित न ठेवता इतरांसाठीही योगदान देण्याचे आवाहन अमिन खान यांनी केले.
स्नेहा फौन्डेशनच्या प्रमुख तथा ज्येष्ठ समाजसेविका शिबानी बागची यांनी त्यांच्या तीनही मुलींच्या पालनपोषणापासून ते यशस्वी होण्यापर्यतच्या काळातील कटूगोड आठवणी सांगितल्या. त्यांच्या हस्ते उद्यमी प्रशिक्षण यशस्वीपणे उत्तीर्ण केलेल्या राज्यातील 56 महिलांना प्रमाणपत्रे प्रदान करण्यात आली. प्रशिक्षिका सुनंदा बनुबाकोडे व प्राची कुलकर्णी यांना सन्मानीत करण्यात आले. यावेळी प्रशिक्षक संदीप पाटील व हरिश बावचे, सहायक दिनेश नीळकंठ उपस्थित होते. कोकिला शिंदे यांनी सूत्रसंचालन केले. नीळकंठ यांनी आभार मानले.
- माघ शुद्ध दशमीच्या डॉ. नामदेव महाराज शास्त्री यांच्या कीर्तनाला स्थगिती
- ‘मनाचे श्लोक’ पाठांतर स्पर्धेस मोठा प्रतिसादात संपन्न
- वस्तीगृहातील मुलींसमवेत लेकीचा वाढदिवस : बाबन्ना कुटुबांचे बर्थडे सेलेब्रिशेन
- मावळ राष्ट्रवादीच्या बैठकीत उपमुख्यमंत्री पवार व आमदार शेळकेंच्या अभिनंदनाचा ठराव
- राज्यस्तरीय अभिवाचन स्पर्धेत ‘बलम सामी’ प्रथम
